Saturday, May 8, 2010

السبت

يوم السبت بالنسبالي يوم غريب

ببقى شايله همه جدا

بصحى فيه مزاجي مش قد كدا ,, وفي الغالب بيكون عندي طاقة سلبية عالية

ورغبة في احراق العالم من حولي

لذلك ينصح بعدم الاقتراب أو التصوير يوم السبت صباحا

لأني لازم أفضي شوية من شحنتي في أي حد أيا كان ولو حتى بيقولي صباح الخير

الغريب وغير المقبول منطقيا

إني ببقى عايزة صحبة, أي صحبة تكون معايا

ولو حتى ع الماسنجر

ومع ذلك أول ما أقابل حد أروح هابشه فيه بضوافري

وهو وبخته

يا اما يطلع حد عسول فياخدني ع الهادي لحد ما تطفر دمعتين حرقة من عيني وأقدر ألاقي ابتسامتي


يا إما يطلع هو كمان صباحه مش قد كدا

فنطقش في بعض

وللحق يوم السبت كان مفصلي في كتير من علاقات حياتي خلال السنتين اللي فاتوا

فيه علاقات بقت أقوى عشان خاطر محادثات يوم السبت

وعلاقات تانية ودعتها ,, برضه على عتبة يوم السبت

..

كتير بفكر إن سر إكتئاب السبت هو إنه أول يوم شغل بالنسبة ليا , بس ماافتكرش ان الناس اللي بتبدأ يوم الحد بيكون عندها المشكلة دي بالطريقة دي

فبقول إن جايز إن المكان بيكون فاضي شوية عشان مش كل الناس بتشتغل يوم السبت عشان كدا بحس بالخنقة دي

بس أرجع و أقول أنا مش حد بيقعد كتير مع زمايله

أنا ممكن اليوم يعدي ما أتحركش من مكاني

يعني مش مفتقداهم ولا حاجة

وكتير بميل إني عندي مشكلة مع الشغل أساسا والسبت هو الرمز بتاعه

ودا ممكن يكون أقرب للواقع

حد بقى يسألني وانتي مستمرة ليه طيب ,, بتعملي في نفسك كدا ليه

هو نظرا لأني بكتب يوم السبت

فأنا مش هقدر أتكلم بحيادية عن موضوع الشغل

نخليها لبكرة هقول كلام موزون أكتر وحقيقي أكتر

خالي من الولعة

..

يومكم أكثر بهجة

5 comments:

ملكة said...

هو انا يوم السبت ماببقاش مظبوطة برضو
قلة النوم واختلاف الأجازات سيء جدا
بس مش لدرجة اني ابقى ماشية بقول شكل للبيع
وعموما
الصحيان بدري بالنسبة للكائنات الليلية.. عملية مزرية ونتايجها مزرية أكتر :(

samy said...

شكرا على البهجة اللى بعتهلنا


الحقيقة فى ناس كتير بيكرهو السبت

دة غالبا علشان اول يوم دراسة واول

يوم شغل

بس انا كنت مبحوش بس مبكنش بالحالة اللى انت فيها دى

بس عادى

كل واحد بيكون لية شيىء

بيخلية فاقد التركيز

وفاقد التواصل مع اللى حوالية

شكرا

alo2ah said...

:)) أنا شلة كارهين يوم الأحد .. أعتقد انه أي يوم بداية للأسبوع بكون نكد كما تصفين ، لكن عموما اعانك الله وخفف عنك :)

هدى said...

ملكة

هو انا في الحقيقة مش كائنات ليلية

بس الصحيان بدري بيشكلي حالة من العكننة مالهاش مثيل

مؤخرا بقيت بنزل الشغل الساعة عشرة

الحالة اتحسنت شوية راح الشغل ذاته بطل يجي لا بدري ولا متأخر

ربنا يسامحه بقى

هدى said...

سامي

اي خدمة

شاكرالك متابعتك المستمرة

...........

قلوقة

تقريبا هتلاقي لكل يوم رابطة من الكارهين


ربنا يعينا أجمعين