Saturday, February 17, 2007

قوي +ضعيف




لحد وقت قريب كنت فاكره انك لما تعبر لحد عن مشاعرك ناحيته ..ايا كان الشخص وايا كان مستوى العلاقة او

نوعها .. طبعا المشاعر الايجابية مش السلبية فموقفك دا هيزيد من غلاوتك عنده وهيقابل الاعتراف دا ايا كان شكله بالامتنان ..وبقول امتنان وليس حتى مبادلة مشاعر .. بنوع من افساح المجال في نفسه لشعور طيب من شخص اخر


لكن كل هذا كان مجرد افكار عابثة ..تنفع لحد فاتح باب مشاكل القلب .. يملا بيهم نص صفحة .اما في الحياة بتاعتنا دي ..فلا .

عندنا هنا انك تعبر عن مشاعرك يعني انت انسان ضعيف ومحتاجلي انا الانسان القوي بعدم احساسي ..

طيب ياعمنا انا ضعيف مش هزعل ..عاملني برقة تتطلبها علاقة القوي بالضعيف

برضه لا ..حبني وانا تقيييييييييييييييل ..وقوي ..........وقاسي


واتعامل انت بالاهتمام المبني على احساسك ناحيتي ..وانا ساقبله بالتجاهل لك ولاحساسك ولكل تفاصيل معاملتك ليا


للحق فيه ناس بتشذ عن القاعده

لكنهم غير واضحين ..ولا يقومون بعمل دعاية لمنهجم في التعامل فتجد ان السائد واللي الناس بتروجله هو المنهج الاول


احيانا بفكر اني كمان لحد ما بتعامل بالطريقة دي ..واني مش بعرف اعطي من يستحق ما يستحق


فغرق اللي متجاهلني باهتمامي ..وانشف كل اهتمام من اللي مهتم بيا


ياترى انت قوي ولا ضعيف ؟

7 comments:

الربان said...

تحياتي

شكرا علي الموضوع.... و حقيقي انا أعتقد انه يجب ان نشعر كل من حولنا بحبنا لهم....مع اختلاف نوع هذا الحب طبعا. بمعني، اشعر زوجتي بحبي لها بطريقة بتكون مختلفة طبعا عن طريقة اظهار حبي لاختي....و اظهار حبي لاخي طريقته تختلف عن طريقة حبي لابن عمي مثلا...و هكذا..

لكن في النهاية التعبير عن حبنا شيء إيجابي و مطلوب لا بل أكثر من هذا...مطلوب تعزيزه بمعني دعمه و تقويته...

الحياة بدون حب قاسية... و مرة أخري أقصد كل أنواع الحب...فقد يكون أحدنا يفتقد نوع من الحب و يوجد لدية انواع أخري قد تعوضه عما يفقده.

تحياتي و تمنياتي لك

Anonymous said...

في الحقيقة تقدري تعتبري الجنس البشري كده هوا طبيعته كده و خلاص

فعلا الناس اللي تقولهم إنك بتحبهم في الله و تحاول تقرب منهم بتلاقيهم بيبعدوا عنك تدريجيا

و العالم اللي انت ما انتش طايقهم هما اللي بيلزقولك

إعتقادي إن الإنسان لما يكون بيحب واحد لازم يخلي علاقته بيه طبيعية

يخلي الأمور تمشي ببساطة و تلقائية من غير فذلكة و من غير ما تبين المشاعر دي
لأن في الأول و في الآخر المشاعر دي أحاسيس
و الأحاسيس عمرها ما اتنقلت بالكلام

يمكن بعض ناس بيفكروا إن ده تجاهل لحقيقة الحب و الصداقة
إنما فعلا دا هوا اللي لازم يتعمل عشان العجلة تدور

تحياتي

هدى said...

الربان

سعيدة بتعليقك

وانا فعلا قصدي كل انواع الحب لاي شخص

انا ما حددتش انه حب بين رجل وامراة

ومش مهم اننا نعبر المهم اننا نلاقي صدى التعبير دا

تحياتي

هدى said...

محمد فوزي

نزار بيقول

كلماتنا في الحب تقتل حبنا

ان الحروف تموت حين تقال

بس كل الصيغ التانية في التعامل بين الناس مش بتتفهم

ولا ايه ؟

تحياتي

محمد العدوي said...

هذه المرة الثالثة التي اكتب فيهاردا هنا ..

وطبعا في كل مرة تنقص كلماته وينقص ما فيه ( من اغيظ

المهم .
أظن ان خلاصته بقى وأمرنا لله حاجتين : الأولى أني أرى ن الضعف الحقيقي هو في العجز عن ابداء الحاجة مش في ابداءها ..

كمان ان كانت الحاجة في ذاتها ضعف فهي الضعف الذي هو تمام الحياة التي ركتبت في جملتها من الزوجية .. وإن كان لكل أحد أن يختار بين أن يكون قويا أو يكون ضعيفا فإن الركون إى طرف واحد منهما يحرم من متعة الحياةالتي لا تكون إلا باختماعهما ..

بس

Ahmed Rashwan said...

قوي وضعيف ، جبان وشجاع ، مجنون وعاقل كلها متناقضات تهيم بداخلنا
في لحظة ما أكون أي حالة من الحالات السابقة ولكن الأهم بالنسبة لي أن أشعر أنني أنا
التعبير عن المشاعر من وجهة نظري ليس ضعف بل هو منتهى القوة

هدى said...

عارفة فكرة الضعف الي بتتكلم عنها يادكتور محمد ..بس الضعف اللي بيقابل بنوع من الحنان اللي يحوله الى قوة في لحظة لكن الضعف اللي بيقابل بتجاهل بيزيد الالم والندم

سعيدة بتعليقك جدا


.......................

فيلم

لولا نعمة اختلاف الاحوال الواحد ما كانش استمر في الحياة ولا ثانية

ولكن

الحمد لله الذي لا دائم سواه