Saturday, September 22, 2007

رمضان كريم


على ما قدرت استوعب الحياة في الصوم


كل سنة وانتوا طيبين

إذا كان لازال هناك احدا يخطو بقدمه الكريمة مدونتي المهجورة على حسب ملاحظات الجماهير المتعطشة لكتاباتي

اعتبروا السطر اللي فات غرور

المهم


كنت من قبل رمضان عايزة اتكلم عنه بس مش عارفة دلوقتي هتكلم عن ايه


مفتقدة بكار بجنون

ازاي رمضان من غير بكار
ازاي قدروا

ظاظا فظاظة وجرجير طازة مش قادرة تملا فراغ الطفل الاسمر بلهجته النوبية وصوت محمد منير الدافي في التتر

الله يرحمك يا دكتورة منى أبو النصر

***********

مش مع حملة مقاطعة المسلسلات العربية

رغم اتفاقي مع كثير من مسبباتها

انا بقاطعها بسبب تدني مستواها

انت من نفسك كدا بعد ما تشوف حلقة واحدة بتقررما تكمملش
الصدفة او الريموت

وقعني في مسلسل "حق مشروع" لحسين فهمي

وشفت مشهد اميرة فتحي وهي بتتعاقب على حبها لابن الجنايني
بغض النظر عن استهلاكية الفكرة
المشهد بحذافيره شفته قبل كدا في مسلسل "الحب موتا" لنفس الكاتب الللي المفروض انه كبير قوي محمد صفاء عامر
على العكس لقاء الخميسي اللي ادت الدور في المسلسل الاول كان ادائها اكثر اقناعا
يعني على رأي واحد صاحبنا

تكرار ممل لما تم حكيه
وهكذا دواليك

يسرا لازالت السيدة الشريفة الوحيدة في مصر



والهام شاهين الفتاة البسيطة التي تتحول بين يوم وليلة الى سيدة اعمال وشاطرة سبحان الله وتكسب بالملايين
ومش فاكرة مين الباقي

يعني هنقاطع هنقاطع ..بكيفك او غصب عنك

***************

عرفنا بقالنا سنتين تلاته السيت كوم

يعني مسلسل يعتمد على مواقف كوميدية متنوعة لنفس الشخصيات

عملوا السنة اللي فاتت تامر وشوقيه

وكنت شايفة انه مش عبقري قوي



خاصة ان نجومه مش كوميديين

لكن السنة دي وبنكهة لبنانية اضفاها اسد فولادكار المخرج السينمائي
راجل وست ستات
محقق نجاح حلو
وعامل تيمة حلوة باني عليها افكار جميلة

حطها كاتب بكار "عمرو سمير عاطف " مع ورشة كتاب شباب
على فكرة هو اللي حاطط تيمة تامر وشوقية برضه
**********
الدراما السورية

هظلمها لو اتكلمت عنها في ضمن ملاحظات عامة
دراما بتجبرني اتابعها لانها بتحترمني كانسانة
هكتب عنها تاني بالتفصيل




























7 comments:

رضوى داود said...

اولا
سعيدة جدا جدا جدا ...جدا
(و...دي على رأي بتوع الرياضة -جبر و هندسة وكده يعني-يعني عدد غير محدد كتير و السلام)لاني دخلت و لقيتك كاتبة حاجه جديدة
فعلا كنت مفتقدة كتير كتاباتك يا هدي

اما بقي بكار فانا للاسف ماكنتش بحب اشوف غير المقدمة و النهاية و الحمد لله ماشفتش ظاظا فظاظة دي
فا مش مقهورة عليه قوى

الدرما المصرية خلاص افقدتني الامل
الدراما السوري بقى مستنية اشوف هاتقولي عنها ايه
انا متابعة حاجه واحدة ليها و شكلي مش هاعرف اكملها علشان الامتحانات و الشغل و كده
بس فعلا هي مبهرة و الصورة مالهاش حل

و تحياتي يا قمرة
ماتغيبيش كده كتير
فعلا بتوحشينا

عين ضيقة said...

تصدقى ان المسلسلات رخمة فعلا
وبتجبرنا اننا مانتابعهاش

نادية الجندى عاملة شجيع السيما
والهام شاهين الوضع الذى لا يصلح سوى فى الأفلام القديمة
وغيرهم بقى

هو المحترم يعنى هو صلاح السعدنى عامل مسلسل ضد التطبيع كويس جدا
ويحيى الفخرانى كمان كويس كوميديا لطيفة كده

بس بينى وبينك انا مش مفتقدة بكار
انا مفتقدة بوجى وطمطم بشدة


وكل سنة والفن بخييييييير

إبـراهيم ... said...

حمد لله ع الســلاااامـــــة .
.
.
.
أنا كنت منتظر منك موضوع (بوست قديمًا ) زي ده كده ، وملاحظـات ع الماشي ، أحب أقول لك إني أتفق مع ما جئت به ( باستثناء بكار) لسخافته المفرطة ، وشايف كراكيب بيقدم حاجة جديدة السنه دي !
مممممممممممممممممم
آآه ، راجل وست ستات خرج بره المقاطعـة فعلاً


.
.
و تحيااااتي

هبه الاسكندرانيه said...

اولا احب اقولك انى سعيده باكتشافى مدونتك
ثانيا انا بالنسبالى التليفزيون فى رمضان كان يعنى بكار و كنت حعيط لما اكتشفت انه مفيش السنه دى
لازم نخليهم يغيرو رئيهم فة الموضوع ده ما توم و جيرى ممتش بموت مخرجه و كل شخصيات والت ديزنى اشممعنى بكار عايزين يموته ده بدل ما يفتحه له العالم اكتر و يوسعو النطاق بتاع الحدوته بتاعته بجد بجد حراااااام
ثالثا اسفه لو طولت عليكى
وفى النهايه ليكى حبى و احترامى الشديد

fawest said...

طب حرام عليك نفسك
هتبعى كل المسلسلات
عشات تعرفى مين حلو و مين وحش ريحى نفسك
مقاطعة يعنى مقاطعة

محمد العدوي said...

ايه دا ..

رمضان جا المدونة هنا ..

نورت يا هدى ..

بكار عمري ما لحقته . دايما بفتح وهو بيخلص لذلك مش مفتقده قوي ..

ظاظا وجرجير بقى كنت بحبهم السنتين اللي فاتو .. للاسف معرفتش اشوفهم السنة دي ..

كنت ناوي قبل رمضان اشوف الملك فاروق والمصراوية ورجل غني فقير جدا .. حلقة من الملك فاروق حسستني بملل غريب او يمكن انا كنت زهقان سلفا .. المصراوية بشوف منها حسب التساهيل .. برنامج نور الشريف على دريم كنت عاوز اتابعه هو الاخر مشفتش منه الا حلقة واحدة مش عارف اقعد أؤاخيها بواحدة تانية .

سقف العالم كمان أول حلقة زهقتني بس لسة في أمل اني اشوف منه حلقة تانية تبقى أحلى . ..

محمد مصطفى said...

ليه بس دي كووووووووووووول المسلسلات عبقرية يا بنتي
أنصحك تبدئي يومك بيتربى في عزو ثم كملي الدالي بتكون لسه ماخلصتش و اقلبي على راجل و ست ستات و بعدين سوبر هنيدي و تامر و شوقية
و بالهنا و الشفا