Sunday, September 30, 2007



بقالي فترة عايزة أكتب عنها


خصوصا مع الأزمة الأخيرة اللي اتعرضتلها وكنت متوقعه رجوعها لكن مش بالسرعة دي


بيعجبني فيها اصرارها واجتهادها


نجاحها


وقدرتها على الحفاظ عليه


هالة سرحان


اللي رجعت بعد كووووووول اللي حصل ببرنامج بيجيله كل نجوم الوطن العربي اللي من الوزن التقيل يقبلوا ايديها ويعتذرولها عن غيابها ..ويهنوها على عودتها اللي اخرست الجميع



رغم ان البرنامج سبقه كتير كلام من الصحفيين اللي مش عارفة لما تموت هالة سرحان هيتكلموا عن مين عن ان النجوم رفضوا يروحلها ..وانا لحد النهاردة مش شايفة حد رافض ..اكتر نجومها مصريين وممتنين لها جدا


طبعا مش عايزة المح للمبالغ اللي قبضها الفنانين عشان يغنوا ويرقصوا زي الاراجوزات لمدة ساعتين على الهوا من بيروت


بس النتيجة هتكون واحدة ان هالة مذيعة ناجحة بتخرج من كل ازمة باصدقاء يعادلوا الاعداء اللي بيتكسبهم برضه


هالة سرحان اللي الناس محتارة في الدكتوراه بتاعتها ومش عارفين هي دكتورة في ايه


واللي مش بيعرفوا يشتموها غير بان ضحكتها عالية وتعليقاتها احيانا بتبقى خارجة


المذيعة المصرية الوحيدة اللي ممكن الاعتماد عليها لعمل قناة تلفزيونية ولم تنجح اخرى مهما كانت امكانيتها


عملت الايه ار تي واطردت


ودريم واطردت


واهي بتلمع روتانا يوم عن يوم


ومش مهم هتروح فين


هتقابل رجل اعمال تاني يعرف يستغل امكانياتها الاعلامية المتميزة عشان تفتح قناة جديدة ليها بريق تاخده معاها لما تمشي


ايوة انا معجبة جدا بيها


ما كنتش شايفة خطأ كبير انها تعرض فتيات الليل في حلقة برنامجها ماهم موجودين برضه في الحياة والتلفزيون والصحافة وكل حتة


زعلت منها لانها وقعت في غلطة مهنية وهي الفبركة ..بس


لكن صورة مصر اسألوا عليها تقارير حقوق الانسان


ولاخبار اللي بتوصلنا عن كرامة المصريين المهدورة في الدول العربية قبل الدول الغربية


مش هقول ان هالة سرحان ملاك لكنها شيطان ناجح ...وهذا يكفيني


5 comments:

محمد العدوي said...

هههههه حلو فكرة شيطان ناجح دي .

النجاح يفرض احترامه على أي حد . والهمة والجهد هي ما يضع المرء في المكان الذي يريده .

كثيرون ممكن يطلق عليهم اللقب دا .. مش ملائكة . لكنهم نجحوا . واصروا . ووقعوا وقاموا ..


بس هل تتعلم الملائكة من الشياطين ولا الجهد دا سمة الشياطين ..


كل الود

هدى said...

العدوي

بداية لا توجد ملايكة

بس خلينا نتكلم عن اللي عاملين نفسهم ملايكة

للاسف لا ما بيحاولوش بتعلموا من الشياطين

بيكتفوا بالانشغال برجمهم طول الوقت

اللي حصل مع هالة سرحان في المرة الاخيرة كان مهذلة بكل معنى الكلمة

رغم انه لا يقل سوء عن الحلقات التلفزيونية او التغطية الصحفية اللي اتعملت للطفلة هند

ولا عشان هما مش بيضحكوا بصوت عالي

ما بحبش الكيل بمكيالين

مدونة مصريات said...

عزيزتى هدى، مدونتك جميلة و الأجمل اهتمامها بموضوعات متنوعة و جريئة. تابعت البوست عن "ممرات العشاق" و أشكرك لاهتمامك بالموضوع. وأتفهم تماماً احباطك لانقطاع حالة التأمل فى المقال و التى ترجع لطبيعة الواقع الذى يجعل من الصعب أن نترك أنفسنا للحظة جمال و كأن الحديقة هى هذا الخيال الهارب منا دوماً. يسعدنى أن التأمل امتعك. تحياتى لك، أمنية النجار

هدى said...

استاذة امنية النجار

سعيدة جدا بالتواصل معاكي وتشريفك مدونتي

عندك حق الحلو ما بيكملش او ما بقاش ينفع نكمله

الواقع ضاغط علينا بشكل كبير بيقفدنا متعة الاندماج مع الحياة

تحياتي

cigara... said...

لماذا
شيطان
ناجح
؟؟؟؟؟؟؟
هي
ليست
ملاكا
و
لا
شيطانا
هي
انسانة
ذكية
جدااااااااا
مجتهدة
عنيدة
قوية
جريئة