Tuesday, August 3, 2010

أفلام


كنت بتفرج على فيلم "بحب السيما" انهاردة, الحالة بتاعت الفيلم فيها شجن وحنين عالي قوي ,, فكرتني جدا بحالة رواية "ريشة طائر تنتقل بهدوء من مكان لآخر", يمكن اللي ربط بينهم فكرة الولد اللي بيحكي عن شوارع مصر في السيتينات, والحالة كمان مربوطة معايا قوي من ساعة ما قريت عدد مجلة أمكنة بتاع السينما اللي كان فيه حواديت عن السينما وبدايتها في مصر والأفيشات ودور العرض,, مصر والسينما والحنين لزمان في ذكريات ولد صغير, يمكن مش الخلطة دي تحديدا, لكن الحكي وغوايته وسحره الخاص.

كلنا بنحب الحواديت بنسمعها بشغف شديد وبنبقى مستنين تاخدنا لسكك جديدة وعوالم مختلفة, حاجات تخلينا نشوف نفسنا بطريقة أوضح, الأفلام الجيدة بتعمل دا وبتضيفله نكهة جديدة لو متشكلة الحكاية بصور حلوة, زي فيلم بحب السيما الإضاءة فيه كانت ملهمة على مدار الفيلم, حتى النور الواقع على وجوه الشخصيات تقريبا كان محسوب مساحته بالسانتي.


كنت بقول الحكي هو الي بيزود شغفنا سواء بالروايات اللي بنقراها او بالأفلام, يمكن عشان كدا الفيلم بتاع فورست جامب واخد الشعبية دي, طبعا مع التأكيد على جودته الفنية, بس لأنه هو كمان حدوتة حياة واحد مش زي اي واحد فينا واحد ماشي في الدنيا زي ما كلنا بنمشي الهوا بيطوحه في الحتة اللي هو عايزها.


الفيلمين خلوني أفكر ان فيه نوعية من الأعمال الفنية بتبقى متفردة, بتاخد حتة من روح صانعها وتخلدها, وتوزعها على كل المتلقين حسيت جدا بدا في الفيلمين.. واحيانا كتيرة بحسها في روايات أو حتى نص واحد, بيكون عامل زي ما يكون مصنوع بنسيج مأخوذ من القلب والعقل والروح, والمتلقي بيستقبله بنفس الطريقة وكأنه غير قابل للرفض.


السؤال اللي محيرني, ممكن أقدر أعمل دا في يوم؟؟

2 comments:

Ramy said...

أزيك (:

انا بحب فيلم بحب السيما جدا و كنت بأختلف مع كل اللى بينقدوه جدا

دة صحيح احنا بنجتذب للناس اللى بتعرف تحكى كويس حلو

بس يمكن انا بحب كل ما هو قديم
وبحب الناس اللى بتحكى عن زمان
(:

السؤال اللى محيرك

تقدرى طبعا

صدقينى كل بوست بتكتبيه ليه حاله جميلة جدا من شجن لحنين لرأى

صدقينى كنت بحس بدة فى كل بوست ليكى

عارفة انا هقولك حاجة بس مكنتش عاوز اقولها

انا ذكرتك و ذكرت مدونتك فى بوست عندى كنت بأتكلم فيه عن مدونين و مدونات اثروا فيا
و كنتى انتى من ضمن

بجد صدقينى لو عندك فرصة لعمل شيىء اعمليه و صدينى الناس هتحسه زى ما انتى عاوزاه

انا اسف لو كنت طولت عليكى

ربنا معاكى و يوفقك

Rana said...

أحلى حاجة..
بتتكلمي عن الفيلم اللي بحبه والرواية اللي بحبها :)