Tuesday, August 10, 2010

بعودة الأيام

وحسيت إن فعلا رمضان جه,, مش عشان المفتي قال إنه شاف الهلال في سوهاج وتوشكى ولا عشان غنى عبد المطلب إن رمضان جانا رغم إني عمري ما استغنى ياطلب
بس عشان بقالي كام سنة مش بحس بليلة رمضان زي زمان ,, كنت مصممة أفتح عيني كويس وألقط كل بشايره
الصراحة ما خدتش مني الفكرة جهد كبير,, محل الفول والطعمية كان بيقطع البطاطس من الساعة 6 بعد الضهر ولما نزلت الشارع بعد المغرب لقيته خلص تركيب الزينة والكهربا ع المحل وبدأة فعلا يقلي البطاطس
مع آذان العشا ودخولي المسجد اللي أخيرا ركبوا فيه تكييف ومع زحمة العيال الصغيرين ,, وصوت الإمام وهو بيفتتح ليلة رمضان بسورة مريم
ابتسمت برضا حقيقي عن نفسي وعن الحياة, إني قدرت أحس ببهجة رمضان المتخزنة جوا روحي في صوت تلاوة قرآن التراويح
وبتميمة "اللهم اهدينا فيمن هديت"
حسيت لأول مرة من سنين بفرحة هلال رمضان وبكرم الشهر اللي بيمنح كل الناس رغباتهم بدون مفاوضات مسبقة
كل عام ... رمضان كريم
وتقبل الله منا ومنكم

4 comments:

مروة said...

كل سنة وإنت طيبة يا أحلى ياسمينة
أهو أنا دلوقتي حسيت بفرحة رمضان
ربنا يخليكي وتفرحينا دايمًا

مروة said...
This comment has been removed by the author.
قهوة بالفانيليا - شيماء علي said...

كل سنة و انتي طيبة ..
:)
تقبل الله الصالحات من من أعمالك في رمضان
و ينعاد عليكي و على كل اللي بتحبيهم بالصحة و العافية و البركة

Ramy said...

كل سنة و انت طيبة

رمضان زى ما هو احنا اللى أتغيرنا

بالناس اللى حوالينا و كل شيىء

ربنا يفرحك دايما

رمضاااان كرييييم

اسف جدا ع التأخير

ارجو تقبل اسفى

شكرا (: