Tuesday, June 23, 2009

حاستي السادسة


الفكرة جت من عن الفيس بوك


اختبار الحاسة السادسة اللي بتملكها


أنا طول الوقت عندي يقين لا يقبل التشكيك فيه من أي حد إن عندي حاسة سادسة وقوية جدا كمان


بغض النظر عن حقيقية الفكرة أو كرهي ليها في اوقات ما لما تفضل الأصوات تعلى في دماغي وتقولي حاجات ما ببقاش حابها بالقدر الكافي


ببتسم ابتسامة خفية في اللحظة اللي بيتأكدلي فيها صدق احساسي


لما يأتيني الخبر اللي حسيته وجمعت عليه دلائل لفترة طويلة


كتير بحس إن التأكيدات لإحساسي بتجيني طوعا مش كرها


كتير بتجاهل احساسي


خصوصا مؤخرا في محاولة لتوفير طاقتي في أشياء مهمة -زي التركيز في علاقتي بجوزي- وبحاول أوطي الأصوات اللي بتقولي حاجات عن الناس اللي حواليا


ومع ذلك الأصوات بتقولي كلام


والكلام بيلاقي علامات تدعمه


ويتحول خلال فترة لـ "خبرية" على رأي اللبنانيين.. تخليني زي ما قلت ابتسم


المتتالية دي كانت كتير بتخليني أبقى حابة نفسي .. خصوصا لو كنت قادرة بطريقة ما على مساعدة الحد اللي بتراودني أحاسيس عنه لو كان في مشكلة أو ضيقه


اللي بيضايقني ومؤخرا .. إني بقيت بحس إني مش قادرة حتى أقول للحد إني حاسة بيه كفاية


إني بسمع أصوات و أنا قاعدة لوحدي أو أول ما اصحى من النوم .. بيخطرلي حاجة عنه


وإني لما أشوفه بيتأكد احساسي قوي


وإنه لما بيحصل اللي حسيت بيه .. وبعرفه .. مش بقدر أقول غير كنت حاسة


الفترة الأخيرة بقيت نزعج من الصوت.. بطرده لما يجيني .. وبفكر إن مش منطقي احس بالبعيد قد كدا


من أيام كنت متوحدة مع الحالة لدرجة اربكتني .. مع إني ما عشتش تفاصيلها بقدر كافي بس كام ساعة قريبة من الشخص دا خلتني أبقى عايشة حالته وكأنها تخصني


دا بقى من التأثير السيء لتحقق الإحساس مش بمجرد معرفة الخبر اليقين .. لا ومعايشته بطريقة ما


هو أنا بقول الكلام دا ليه


اه عشان الفيس بوك -اللي ادمنته مؤخرا- قاللي إن حاستي السادسة هي الأصوات اللي في دماغي بتقولي ع اللي بيحصل في مكان ما بعيد


وعشان أنا حابة أوطي الصوت شوية.. هيكون أحلى بكتير إني اسمع أصوات حقيقية بدل أصوات الأشباح في عقلي.. المنهك من تجميع العلامات والإشارات و الخطوط المتقطعة لتكوين صورة تقول حكاية .. جايز ما يكونش من حقي أصلا إني أعرفها


صباحكم إحساس من غير أصوات

3 comments:

العنكبوت النونو said...

حلو ده
مش حلو قوي
المشكلة ان مفيش زرار mute في الحاجات دي
:)

ست الحسن said...

أولاً
وحشني التعليق هنا

ثانياً
التدوينة مكتوبة بصدق وبعمق

ثالثاً بقى

أرجوكي ... من فضلك إوعي توطي الصوت
لا تقاومي حدسك أبداً
بالعكس إديله مساحته الكافية
الحدس أو الهواجس أو همس الروح زي ما بيسموه
دي منحة غالية جداً

موضوع
وانا مالي
أو أنا ليه بحس بالناس كدة وساعات بطريقة بتوجعني
بتوجع فترة على حاجات متخصنيش

بصي الموضوع ده ليه معنى
وإحساسنا بالآخر جزء من إحساسنا بنفسنا
مفيش حاجة بنلقطها من اللي حوالينا مفصولة عن اللي بيحصل جوانا
حتى لو كان الرابط بعيد أوي

ويمكن النور ده عندك
لأن فيه مهمة مستنياكي
أرجوكي كوني دايماً مستعدة

....

مساء الورد يا هدهودة

هدى said...

منى

عندي نفس ترددك

غادة

مصدقاكي قوي

ووحشني تعليقك هنا

وبحاول أتبع نصيحتك ... عن جد