Wednesday, April 15, 2009

صباح

ساعات أقوم الصبح قلبي حزين
مش بيبقى عندي مزاج للحياة
ومع ذلك عندي قدرة على إجبار نفسي على ممارسة الحياة .. بتكشيرة عريضة
بيوجعني قوي إني ابقى مضطرة ابتسم
بس بحسها ضريبة ولازم أدفعها إني جوا الحياة
الغريب إن انهاردة الحياة مبتسمه عند الناس حواليا
وحش الفيس بوك بيخليك قاري وشوش الكل .. ومحدد مزاجهم بالسنتي
ولما يبقى مزاجك مش قد كدا تتجنب تحط حالة على صفحتك وتكتفي بالتعليق على النشوة المتسطرة على طول الحائط بتاعك على الوشوش الصباحية
يمكن تتنقلك العدوى
قلت إن الدنيا غريبة
آديني بقول
...

4 comments:

رضوى داود said...

ازاي الواحد ينفذ قرار صعب واخده
ازاي نعرف نعمل حاجه قلبنا مش مطاوعنا عليها

ازاي بتجبري نفسك على الابتسام
و جواكي كل الحزن ده
الدنيا غريبة حقيقي
...

بس مافيش وقت نضيعة
الحياة ما بتستناش مش ده كلامك برضه
اديني بحاول اللحقها
هاتي ايدك بقى

nudy said...

الدنيا فعلا غريبة لكن علينا اننا نحاول نضحك احنا عليهاوما نسيبهاش تضحك هي علينا
الحزن موحود والفرح موحود بس علينا اننا نحاول نشد الفرح ونمسك فيه ونتعلق باي قشاية منه
طبعا صعب قوي الواحد يبتسم وهو حزين بس عارفة ايه الحاجة اللي تخليك غصب عنك تبتسم وانت حزين ضحكة طفل او مشاغبته ودي اكثر حاجة ممكن تضيع الحزن

العنكبوت النونو said...

مش عارفة ليه حاسة اني من حقي اخد وقت احزن واقول للدنيا اللي مش هتستناني طظ
انا النهاردة زعلان ولازم اعيش زعلي واديله حقه من غير ما افكر
وبكرة
بكرة يفتح الورد وتمطر المطرة وكل حاجة حلوة هتحصل
وبكرة يحلها الحلال
:)
صباحك على بكرة يا قمرة

ست الحسن said...

التدوينة دي دافية أوي يا هدى
مش هي ببتكلم عن ان الواحد موجوع ومضطر يبين انه مبسوط
يعني المفروض تبقى كئيبة أو توجع مثلاً

بس سبحان الله
دافية فعلاً

بالظبط كإنك مسحتي إزاز كان عليه بخار
بالظبط
كإن الحاجات اللي بنعملها غصب
بتشوش طريقتنا في الشوف
ولما انتي كتبتي التدوينة دي
كإنك مديتي إيدك وببساطة ونعومة مش مقصودة رجعتي الإزاز يبرق تاني

عارفة اني اتكلمت كتير
بس تدوينة دافية خالص