كل ما تحصل حاجة
انتفاضة
محرقة
حصار
غزو
اعتداء
نتبادل الدعوات للوقوف على سلم نقابة الصحفيين
ونرفع صوتنا لفوق
ونغير بروفيلنا على الماسنجر
ونحط صورة في المدونة
ونغير اسماءنا الظاهرة لشركائنا في الشبكة العنكبوتية .. لدعوة ع الظالم والمفتري
ونشغل اغنيات وظنية سواء كانت معمولة بصدق أو لمسايرة الموجة
ونتابع الأخبار المحيطة بنا كفيضان يكاد يغرقنا
يوم ... اتنين .. اسبوع
جايز تنتهي المحرقة
جايز ما ينتهيش الحصار
اللي بينتهي هو تفعاعلنا الوقتي .. الالكتروني
المتناسب بقدر يرضي ضمايرنا ... مع اللي حاصل
..
بسمع الشيخ إمام بيقول
يافلسطينية ... أنا بدي أسافر حداكو
وسألت نفسي بصدق
هو أنا بدي أسافر هناك .. حيث الجحيم ؟؟؟
ولا دي فورة مشاعر
يترنم بيها وأنا هنا على مكتبي .. بفطر سندويتشات .. وأشرب شاي مظبوط
و أضحك على نكتة ألقاها زميل؟؟؟؟؟
..
2 comments:
شوفي يا هدي
أنا عندي اعتراف يمكن ميبقاش ظريف بس هو حقيقي
أنا عندي شعور بالتبلد ... يعني بستقبل كل الأخبار من غير متحرك جوايا حاجة
أي أخبار وكل أخبار سواء في فلسطين أو في العراق أو حتى هنا في مصر
ولا حاجة من المصايب اللي عدت واللي لسة هتعدي فرقت معايا
ولما أشوف الناس تتوجع على بتوع الدويقة وتعيط وقلبها يوجعها ع اللي بيحصل في فلسطين
أحس اني معنديش دم ... مبحسش
بس صعب أفتعل مشاعر مش جوايا
وبصراحة مستغربة انها مش جوايا
يمكن يكون ده قلة وطنية أو قلة إحساس أو قلة أدب
إحسبيها زي ما تحسبيها
بس أنا متجمدة تماماً تجاه كلمة وطن ووطنية وعروبة وفلسطين والعراق
متجمدة
ومعنديش أي فكرة أنا ليه كدة
وكمان مش قادرة أفتكر آخر مرة كنت بتعاطف فيها مع الكوارث
حتى أيام الزلزال بس كنت بحلم ان البيت بيقع وكنت خايفة على خالاتي
ومضايقة ان مفيش مدرسة
بس كدة
ولا أكتر ولا أقل
تفتكري علاج الحالة دي ايه
صباحك اخر روقان
وكل سنة وانتي طيبة
بصي ياست البنات
انا بعاني تقريبا من نفس الاعراض بتاعتك
وعشان كدا دايما بقول على نفسي اني مش منتمية
هي الفكرة ان انا وانتي مش مؤدلجين ... يعني مافيش فكرة كبيرة بتحكمنا فيما عدا شعورنا الانساني و الخوف اللي جوانا ..
يعني جايز ناس كتير تقول ان دا غلط .. بس اللي متأكدة منه انه مش غلطنا ...
..
تحياتي ياقمر
Post a Comment