Sunday, December 14, 2008

الأحضان الدافئة


هو انا مش بيبقى عندي رغبة في اني أحضن حد غير لما يكون عندي ناحيته مشاعر ايجابية طاغية على كل ما سواها .. وكمان مساحة معرفة ..تخليني بعد الحضن أواصل الكلام لمدة نص ساعة ع الاقل


بس بستغرب قوي من البنت اللي كل ما تشوفني تحضني جامد قوي .. وبعد 3 دقايق مايبقاش في الفراغ حوالينا غير سؤال "وانتي عاملة إيه" نفضل نبص حوالينا يمكن نلاقي مثير كلام فما نلاقيش


ونكتفي بابتسامة مش أبعد من عضلات وشنا


هتقولوا عليا متزمتة شوية


اريحكوا أنا .. متزمتة كتير


خصوصا في منطقة علاقتي باللي حواليا .. مش بعرف اقول على زميلتي في المكتب اللي بنتبادل الصباحات والمساءات ..وقليل من التعليقات كلما جادت قريحة إحدانا انها صاحبتي


وما قدرش اجي الصبح أبوسها وأقولها انها واحشاني


هنبقى بنمثل


المشكلة مش هنا بالظبط ..رغم انه بعتبرني بهدر حق الناس اللي يستاهلوا الحضن أو البوسة ..بس المشكلة إن احيانا حاجات زي دي بتاذي


لما واحدة تعمل دا كل ما تشوفك وتحسي ان اللي بينك وبينها هو الحضن الجامد دا مش أبعد من كدا .. ما تعرفش حتى انتي اتجوزتي ولا لسه مخطوبة ؟؟!!!!


اللي يغيظ أكتر ..وبيخليني اتشال و اتهبد مكاني ... ان موزعي الأحضان دول بيطالبوا بنفس حقوق الاصدقاء الحقيقيين .. اللي موجودين ولو بعيد ولو من غير أحضان لكن قادرين يشاركونا في مساحات ود .. تخلينا عارفين نبقى معاهم احنا اللي بجد


حقيقيين .. بدون تمثيل


مشاعرنا بتوصل ببساطة التقاء عيننا


عندي اصحاب كتير .. قريبين رغم البعد بقول عنهم انهم اصحابي بثقة .. وبحس بالأمان لما افتكرهم لحظة ما تفلتني واحدة من حضنها

وابقى حاسة ببعد المسافة الفاصلة بيني وبينها


أحيانا بفكر إن المسألة كلها بتبقى زي ما بيصوره البنت في الأفلام أو الصور أفلام الكرتون


حاضنة دب صغير


أكيد هي مش بتحب الدبدوب دا .. قد ما هي محتاجة تحس ان بين دراعاتها حاجة بتحضنها


ويمكن بسيب حضني ليها عشان كدا


بفكر بطريقة بناتي وبقول جايز محتاجة حضن مش لازم مين بيدهولها المهم انه حضن


وساعتها بيخف احساسي بالضيق

18 comments:

العنكبوت النونو said...

يا وحسة
:(
كسلانة ادخل وعشان اكتبلك تعليق لازم ادخل
امري لله
:)
وحستيني يا قمرة

بصي بقى يا ستي
حتى اللي محتاجين حضن في الناس دي قليلين
معظمهم بيحضنوكي وهما مخبيين في قلوبهم غل وسواد ما يعلم بيه الا اللي خلقنا وخلقهم
ساعات بأفكر في الحضن ده على انه ضريبة بندفعهلهم عشان يفضلوا مداريين السكاكين
و ساعات تانة بأستخسره فيهم
عارفة
ساعات بيصعبوا عليا اللي بيعتبروا حضن من غير طعم ده حضن
عارفة التريكو
لما بتشتريه جاهز بيبقى تريكو
لما تعمليه بابرتين وخيط وايديكي لحد بيبقى حب
نهارك حب
:)

العنكبوت النونو said...

نسيت اقولك صحيح
من يومها صار القمر اكبر ع تلالنا وصارت الزغلولة
تاكل ع ايدي اللوز والسكر
:)

إبـراهيم ... معـايــا said...

عسولة اللي اسمها العنكبوت النونو دي ، بس لو تترك العزلة الصيدلانية اللي هيا فيها وتيجي تنورنــا
ممممممممممممممممم
جميل إني ألقى كلماتك هكذا صباحًا ...

وتفكرني بحاجات فظيعة في مفاهيمنا عن الصداقة والصحوبية والمعرفة ... بلا بلا بلا ... :)

واحد صاحبي بيحكي لي كان بيكلم واحد صاحبه، فالتاني بيبادله الكلام والأشواق على طريقة يا "حبيب قلبي" واحشني والله، إيه يا عم فينك ... إلخ ، ليكتشف صديقي فجأة إنه مكنش عارف هوا بيكلم مين ، طبعًا التاني بعدما اكتشف غلطته حاول يصلحها ، بس صاحبي حس إنه بيكلم جهاز كاسيت !! ممممممممممم
ده كان بيكلمه ف التليفون

ما علينـا يمكن الولاد مرحومين عمومًا من موضوع الحضن و التقبيل وما إلى ذلك .....

بس براقب حاجات زي اللي بتقولي عليها دي ...من بعد ، وبيفضل يدور ف بالي نفس ذات التساؤلات .....

شكرًا عمومًا

وصباحك ورد ...

وقص ولزق

العنكبوت النونو said...

اسفين يا ست هدى هنحول تعليقات البوست شات
:)
انا مش في عزلة صيدلانية يا ابراهيم معاك انا بأرد عليكم من قلب الصيدلية
كل اللي شاغلني دودو وكوفية عايزة اعملها
:d
المهم
تصدق اني حالا لسة مخبوطة بست بوسات من تلت اطفال
اكبرهم عمرها ست سنين
ماتقدرش تقول عليهم من النوع ده خالص لأن مفيش طفل هيتطوع يبوسك من نفسه الا اذا كان بيحبك فعلا
بس برضه بأحس ساعات انهن لأنهن بنات
ورثوا الطبع ده من امهن
مجرد تقليد اعمى
مش عارفة
بأزهق بجد بس ما تقدرش تقول لأ
مرة اتكلمت مع واحدة ما تعرفنيش وهي حاسة ان من حقها تنصحني لمجرد انها اخترقت مسافة النص متر الحميمة وانا سمحت لها بده عشان ما كانش فيه كرسي تاني في المكان
جرررررررررررررر

altwati said...

free hugs
أحيانا تعتبر كعمل خيري
أشعر أن الآخرين يحتاجون منا الكثير
أحيانا
وعلينا أن نبادلهم
ودا بود
حتى لو كان ودهم كاذب
فليكن ما عندنا صادق
هكذا نحن في عيونهم
تحياتي

كاتب مصري said...

ما أجمل أن يكون الحضن دافئا وصادقا حينها سنعرف معنى الحب
مودتي

بسنت said...

انا شايفه ان ما احضنش وابوس واسلم غير على اللى بعزهم مش اصدقاء وبس لا اكتر بكتير
ولكن فى ناس فعلا زى واحده تعتبر صحبتى من الشغل كدا ممكن تكون شايفاكى اول اليوم وتشوفيها تانى مثلا فى الشارع لازم نسلم ونحضن من الاول
انا الصراحه بضايق جدا بردوا من كدا
بس بيقولولى دا عادات مصريه ودليل على المعزه والمحبه بس هى حاجه تخنق الصراحه فى حل ممتاز انك تسلمى بفتور وزتمدى ايدك وتنشغلى باى حاجه فهتلاقى الطرف التانى بسلم بس
دى طريقه متجربه
مدونتك عجبتنى جدا
وخاصه الاسم لان الشتا فصلى المفضل
ودمتى بخير

nudy said...

انا فعلا باستغرب علي الناس دي وانها بتقدر تمثل الود بالشكل ده لان ده مش حب والتمثيل ده فعلا بيخنق وبيوصل للواحد دايما ان فيه حاجة غلط وان فلان ده مشاعرة مش حقيقية بس ساعات بيبقي حد بيقدرك ويحترم بجربتك في الحياة وبس نقطة وهي بتبقي في مشكلة انه مش عارف يحبك بس بيقدرك بجد وبيعبر عن تقديره
اتمني لك حب الاصدقاء الدائم

nudy said...

انا فعلا باستغرب علي الناس دي وانها بتقدر تمثل الود بالشكل ده لان ده مش حب والتمثيل ده فعلا بيخنق وبيوصل للواحد دايما ان فيه حاجة غلط وان فلان ده مشاعرة مش حقيقية بس ساعات بيبقي حد بيقدرك ويحترم بجربتك في الحياة وبس نقطة وهي بتبقي في مشكلة انه مش عارف يحبك بس بيقدرك بجد وبيعبر عن تقديره
اتمني لك حب الاصدقاء الدائم

ست الحسن said...

أنا بقي من الرخمين اللي بتتكلمي عليهم

بحب أحضن الناس جاااامد وبحب الناس تحضني بحب وأي كلام يتقال بعد كدة مش مهم...بجد ساعات بحس اني بمنع نفسي أحضن اصحابي الولاد بالعافية

مرة شفت واحد بقالي زمن مشفتوش سلم على بايديه الاثنين سلام طويل ودافي بدرجة اني حسيت بجد انه حضني وان الدنيا برد جاااامد

معرفش ليه بحب آخد الناس في حضني بس يمكن كده بحسهم أقرب ويمكن أنا نفسي بأبقى محتاجة أتحضن فبحضن الناس
ويمكن أي حاجة تانية مش مكتشفاها

بس بجد بحب أحضن الناس بغض النظر عن شكل علاقتنا

هدى said...

منى

منورة الدنيا يا جميلة

ممتنة ليكي انك رميتي الكسل بعيد وافتتحت التعليقات

بيني وبينك كنت قلقانة كتير من البوست دا .. لناس معينين كدا ياخدوا خطوتين لورا

حلو انك تبقى موجودة هنا

امممم

حلو قوي تشبيه التريكو ..

وحلو قدرتنا طول الوقت نفرق بين الحضن الحقيقي والحضن التمثيل

..

بحبك ما بعرف ...

..

صباحك فنجان قهوة يعدل الدماغ

هدى said...

ابراهيم

يعني ايه قص ولزق

قصدك الفيلم ؟

طب ليه وازاي وفين

..
عودة للبوست ..اعتقد ان المسألة مش في الحضن .. يعني اعتبر الحضن رمز بس الحكاية اللي حكيتها دي ..حركة بناتي طحن

انا اصلا كنت عايزة اكتب بوست اسمه ليه بكره البنات .. على رأس الاسباب الحركة دي

..

صباحك ألوان

هدى said...

التواتي

ما اختلفتش معاك

بس عمر الكدب ما يقابله صدق يا صديقي

فاكر بوست الكورة البيضا والسودا

انت بتقدم ايه للناس هما بيردهولك

بس

هدى said...

كاتب مصري

متشكرين على الزيارة
منور


**********

بسنت

تقريبا بحاول اعمل بنصيحتك

وغالبا بتنجح

منورة يا قمر

هدى said...

نودي

منورة

هو زي ما بتقوللي كدا اكيد فيه استثناءات للقاعدة

واكيد فيه ناس بنتصورها بعيدة وهي قريبة مننا

متشكرة ليكي

هدى said...

ست الحسن /غادة

تعرفي بعد ما كتبت البوست .. خطرلي ان فيه ناس من خلال المدونة عملت معاهم علاقات انسانية مالهاش اسم او تصنيف ..علاقة تكاد تكون اقوى من علاقات موجودة بجد في حياتنا وخشيت اكون بأثر في العلاقات دي بشكل سلبي

يعني ..زي ما قلت قبل كدا في الردود ..الصدق بيتحس

ولا ايه يا فنانة

كل الود

pink paradise said...

دعوة للمشاركة فى ورشة البلد الأدبية
اللقاء القادم يوم الخميس 25 ديسمبر 2008 الساعة 7 مساءا بمكتبة البلد
مع
د.بهاء عبد المجيد
يدير الورشة
حاتم سعد
محمد زوام
حسام الدين فاروق
مصطفى محيى
مكتبة البلد: ت: 27922768
31 ش محمد محمود. التحرير. أمام الجامعة الأمريكية ــ أعلى سيلنترو
elwarsha2008@yahoo.com ايميل الورشة
و دى كمان مدونة الورشة منتظرين تعليقاتك
http://elwarsha2008.blogspot.com/

apple said...

AV,無碼,a片免費看,自拍貼圖,伊莉,微風論壇,成人聊天室,成人電影,成人文學,成人貼圖區,成人網站,一葉情貼圖片區,色情漫畫,言情小說,情色論壇,臺灣情色網,色情影片,色情,成人影城,080視訊聊天室,a片,A漫,h漫,麗的色遊戲,同志色教館,AV女優,SEX,咆哮小老鼠,85cc免費影片,正妹牆,ut聊天室,豆豆聊天室,聊天室,情色小說,aio,成人,微風成人,做愛,成人貼圖,18成人,嘟嘟成人網,aio交友愛情館,情色文學,色情小說,色情網站,情色,A片下載,嘟嘟情人色網,成人影片,成人圖片,成人文章,成人小說,成人漫畫,視訊聊天室,性愛,a片,AV女優,聊天室,情色