Friday, July 27, 2007

كلمات



لحظات بتمر علينا ..بتبقى زي الشريط السينما


بتشوف حياتك لقطات من غير صوت


تفتح ابواب الاحاسيس جواك


وتسيبك تواجه ريح الذكرى من غير ساتر


.....



الموت طعمه بيلسع


بيحرق في القلب


وياخدك من ايدك ويدور بيك


حوالين نفسك


ويرجعك لنفس النقطة


مش شايف تفاصيل حواليك


الوان كتير متلخبطة زي لوحة كبيرة مالهاش معنى


.....


تقف قدام نفسك


تسالها بجد


من غير لوع


عايزة ايه بالظبط


تبصلك ببلاهة وتقولك


نعم؟؟؟


......


تحلم حلم جميل وطويل مع موسيقى كلاسيك


متلذذ بنومك وياه


ولما تفتح عينك على نور البلكونة المتسرسب من فتحات الشيش


تحس الدنيا صالة سيما


قطع النور فيها في نص الفيلم



.....


التفكير لعبة قديمة قوي


بتزهقني


.....


السفر

.

.

.

سفر


.....






10 comments:

رضوى داود said...

هدي بجد وحشتيني
كل شويه ادخل عندك ادور
ها كتبت حاجه جديدة
النهارده دي تالت مرة ادخل
**************
تقف قدام نفسك
تسالها بجد
من غير لوع
عايزة ايه بالظبط
تبصلك ببلاهة وتقولك
نعم؟؟؟
******
انا عارفه الاحساس ده كويس
جربته قبل كده قريب
و الحمد لله لسه خارجه منه
بس طبعا لسه اجابة السؤال
بنفس البلاهه ...........نعم!!
حمدلله على السلامه
و ماتغيبيش عننا كتير

Amyra said...

يحيا السفر..يعيش السفر

وحشتيييناا هدى

:)

Ert3ashat said...

هدىىىىىى حمدلله على السلامهه

بجد وحشتني بوستاتك

بوست رائع كالعاده احييكي عليه...

عجبتني اوي حته ديه...خلتيني اتخيلها

تحلم حلم جميل وطويل مع موسيقى كلاسيك


متلذذ بنومك وياه


ولما تفتح عينك على نور البلكونة المتسرسب من فتحات الشيش


تحس الدنيا صالة سيما


قطع النور فيها في نص الفيلم

إبـراهيم ... said...

حقيقي ... تحفــــة قوووي يا هدى !
.
.
الكلام البسيــط قوووي ، الغير منمق ( أو غير المنمق)، ولا المتـعوب فيه ، اللي طالع زي ما هوا كــده ، كل سِنـة إحساس ف الكلام بتوصل زي ما هيا .
.
.
بالضبط

وقفت حبـــة عنـد ( الموت طعمـه بيلسع) .. صورة في منتهى الدقة ...
.
ياخدك يدور بيـك ....
.
.
وبعدين :
التفكير لعبة قديمة قوي

بتزهقني

.....

السفر
.
.
.
س ف ر
... فكرتيني برانيا منصور ( الجـرح ... جرح ) .... تحيااااااتي
.
وحمدلله ع السلاامـة يا صعيدية المغامير ... ومغمورة الصعايدة

dew_bright said...

سلام عليكم أولا

بجد عجبانى اووووى مدونتك واسلوبك الفريد فى الكتابه اسلوبك رائع وبحس دايما انه مختلف وكل ما بقرا لك بوست بحس انك انسانه جامده جدا ..اول مره احس انى مشدوشه لشخصيه حد من المدونين ونفسى اتعرف عليها أدام الله عليكى ملكه الكتابه وروحك العاليه فى التعبير
وياريت متتاخريش على قراءك تانى لان بجد كنتى سايبه فراغ

هدى said...

اميرة

منورة دايما

اعتقد ان طول ما اجابة السؤال بالبلاهة دي يبقى احنا تمام

او بحاول اقنع نفسي بدا

عشان الاكتئاب انتي عارفة انه بيتلكك

هدى said...

ندى

انتي اكتر

تسلميلي ياجميلة

هدى said...

ارتعشات منور ياجميل

فينك وفين ايامك

بجد كنت مفتقدة تعليقاتك

ما تغيبش تاني

وتسلم ياجميل

هدى said...

ابراهيم

التحف لازم يكتبوا حاجات تحف

ولا ايه

ذكرتني باقرب الكاتبات لقلبي

بس انا مش بكتب حلو قوي زي رانيا منصور

على العموم

اي خدمة تعالى كل يوم

هدى said...

dew_bright

اول مرة احس ان اللي بكتبه مهم قوي كدا

مبسوطة لاهتمامك ومتابعتك

واتمني ما تغبيش عن هنا ابدا

كل الود