Saturday, January 9, 2010

الأحلام


الأحلام

هنيييييييييييك على رأي الست نانسي عجرم (الست هنا تقديرا وليس سخرية), بتضوي في عيونا المتعلقة بيها من أول السكة اللي بنبتديها بفكرة صغيرة بتنبت جوا قلوبنا, تتراعى بإيمان يتعتق جوانا إننا هنوصل.


الأحلام


بكل اللي بترشه في حياتنا من براءة ونجاح ونشوة انتصار وحب حقيقي وتضامن وصداقة,,,,,, جايز كلها أو جزء منها ما تكونش حقيقة لكنها بتخلينا نصحى الصبح واحنا مستعدين نواجه كل مقالب الحياة وسخافتها, نحول الإحباط اللي بيتراكم جوانا على مدار اليوم لسلم يرفعنا درجة عشان نلاحق الضي اللي في اخر السكة.


الأحلام


الحقيقي منها, الأصيل, النابع من دواخلنا والمستند على إمكانيتنا ومقدار معرفتنا بيها, اللي واخد من روحنا وطاقتنا واللي بيسهرنا الليل مشغولين نفكر إزاي بكرة هضيف طوبة جديدة في البناء اللي بنحاول نطاول بيه السحاب


الأحلام


اللي بتخلينا نعرف السكة الصح, رغم كل صعوباتها ونمشي فيها مسترشدين بالضي الجاي من بعيد, يوشوشلنا كل ما خطوتنا تأن بإنه خلاص قرب, والحلم على وشك إنه يكون حقيقة


الأحلام


اللي بتقربنا من بعض, نتكاتف, نلاقي نفسنا وسط دايرة, نشبك ايدينا عشان نتقوى ,, ونتحرك بقوة تجبر الحياة على تغيير قوانينها والإستجابة للرغبة الصلبة المتعشقة بقلوب مصدقة حلم واحد.


الأحلام


اللي بتخلينا نعيش على رأي منير, نعيش الحياة بمعناها الحقيقي اللي بيخلينا نشتغل ونتعب وجايز نخسر, عشان نكسب (على رأي حماتي).


الأحلام


اللي بتحارب الخوف, وتحجم ضله جوانا, فنفرد طولنا ونمد خطاوينا ونتلذذ بابتسامة رضا عن نفسنا وعن الحياة وعن الأحلام لما تبدأ الضي يزغلل عيننا كل ما نقرب منه شوية


الأحلام


اللي بترجع الثقة لينا في نفسنا وفي حياتنا وبتخلينا نبقى سايبين الحياة واحنا حابينها, حتى لو بقت أحلامنا متعلقة هناك ,, هيجي يوم تتقطف ويشوف اللي اخدها أسمائنا محفورة جواها لأننا حولنا بكل إخلاص نوصلها


3 comments:

العنكبوت النونو said...

وانا بحلم
:)
فرحتيني مرات النهاردة مش مرة
ربنا يجازيكي الف خير
:)

واحده من الناس said...

كلماتك جميله واسلوبك سلس قوي

بس ساعات خنقة الواقع ماتبسبش مكان لللأحلام

هدى said...

منى

افضلي احلمي, مافيش طريقة تانية عشان نغير بيها حياتنا غير الحلم

...

واحدة من الناس

تسلمي

خنقة الواقع بتتفك عن طريق الحلم ,, الحلم هو الحل يا عزيزتي بس لازم يكون مسنود على ارضية صلبة من إرادة حقيقية وقدرات مصدقين انها فينا

كل الود