Tuesday, May 20, 2008

صورة


طيب كان العدوي صديقي بيقوللي في تعليقه في البوست اللي فات ان تدويناتي صور

والنهاردة عجبتني الصورة قوي

وخطر ف بالي كلام كتير عنها انساني أكثر منه سياسي
(رغم كل القراءات السياسية لمؤتمر دافوس وصوره)

خصوصا ايحاءات ملامح الوجوه الملتقطة في الصورة على سهوة

تحس ان السيدة خديجة الجمال مقموصة

والسيد جمال مبارك وراه مهمة قومية

والبنت اللي واقفة وراه بتبص عليها وتتحسر على بختها يعني هي تفرق عنها ف ايه عشان تنال كل هذا وهي يدوب حد عادي

دا غير الخضة اللي على وش السيد أنس الفقي وزير الاعلام في خلفية الصورة

..

الصور ..اختراع عبقري

13 comments:

بيسوو said...

:)
:)
:)

قوي قوي

قلب ينبض لله said...

صورة جامده
سيفتها عندي علي الجهاز
اصل اتبسطت لما شوفت خديجة مئموصه:D:(

شوفتي انتي بئي البنت الورا دي احلي من خديجه بكتييييييييير

بس مفيش نصيب:(

حمامة said...

لذيذة مووووووووووت

:)

هدى said...

بيسوو

مش كدا

الصور بالنسبالي عالم مبهر

كنت مارست التصوير الفوتوغرافي فترة لكن بعد كدا بطلت

زي ما بطلت حاجات كتير

..

منورة ياقمر

هدى said...

قلب

هو مش نصيب

لان المنطق بيقول السلطة تتزوج المال

يعني هو مش وقع ف غرامها عشان شعرها الاصفر الطويل

ولا ايه؟

هدى said...

حمامة


منورة ياقمر

باسم المليجي said...

الحمد لله إني لقيت واحد تاني ليه نفس وجهة نظري-بتكلم عن العدوي-بالنسبة للتعبير اللي كنت استخدمته زمان فمكنش قصدي.. لكن كان قصدي إن معظم الصور في الفترة دي كانت لستات.. والحمد لله إن ده اتغير دلوقت وبقت معظم الصور لحريم
بالنسبة للتصوير الفوتوغرافي فده حاجة عاملة زي الكتابة أو يمكن اجمل
يمكن من الحاجات القليلة الجميلة اللي بتوفرها المدونات هي بساطة وضع الصور مع الموضوع
وإن كنت مازلت على حقدي القديم تجاه كمية الصور اللي عندك
بالنسبة لصورة الموضوع فده الجانب الخبيث في الحكاية إنك ممكن تفسري أي صورة بالمنطق اللي يعجبك
يعني ممكن نفسر الصورة السابقة بإن خديجة خارجة من المؤتمر مهموهة من كلام بوش عن الحالة الديموقراطية في مصر والمهمة الملقاة على عاتقها تجاه أطفال الشوارع-بالتحديد كانت بتفكر في محمد سعيد- واتأثرت عاطفيا لدرجة إن المصور لو استنى شوية كان لاقاها بتعيط، جنبها بالتخاطر العقلي-التليباثي-كان جيمي بيفكر في بطالة شباب مصر، يا ترى يحلها إزاي.. هل يشغلهم في حديد عز؟ بس المصنع هيشيل مين ولا مين..طب اكلم عز وده صحبي برضك.. لأ بلاش ليزعل وبعدين هما ممكن يفتكروها تكية ويطمعو.. طب يعمل إيه.. يعمل إيه
في خلال التفكير العميق ده كانت الست اللي ورهم بتمضغ لبانة ولا ف بالها- وده سبب الوضع المشين لفمها-
فعلا
شعب سيس

إبـراهيم ... معـايــا said...

باجسم المليجي كات تعليق معتبر ، أنا عاوز أقول إن الصورة دي حلووة قووي،، فعلاً ...
بس تقريبًا أول اقتراب منك ف المدونة لعالم السياسة الشااائـك...

على فكرة بقى بيشدها بطريقة سخيفة قووي، إزاي تسمح لنفسهخا بكده ، هاااه إزاي ؟؟؟؟

هدى said...

باسم

كويس انك اخيرا نزعت برقع الحيا وقدرت تخطي برجلك الشريفة مدونتي النسائية

..
هي دي ميزة الصور حمالة اوجه المثل الصيني بيقول الصورة تساوي الف كلمة
وانا مصدقة دا قوي عشان كدا كتير بتغنين الصور عن الكلام

..
تحياتي

هدى said...

ابراهيم

ليس اقتراب من السياسة انا ادور كما انا في فلك الصورة

..

تحياتي

fayrooz said...

هو الصور عالم رائع فعلا
بس علي فكرة التفسير مش احادي دايما يعني ممكن قوي تكون خديجة بتفكر حقضي الويك اند فين ويكون جيمي بيفكر ف الكلام اللي قاله كان موزون ومقنع والا لأ وتكون البنت اللي ورا بتمضغ لبانة..ويكون أنس الفقي دايخ
احلي حاجة ف الصورة الخيال والخيال بيبقي وحش وهو محدد

ebrahem aladawy said...

هل تسمحين لفضولي أن يدعوك لزيارة مدونتي المتواضعة جداهنا
http://kanyatklam.blogspot.com/
تحيتي

أومي مة said...

الصورة ابلغ من الكلام
نجيب محفوظ شاف رسام بيرسم قاله يا بختك بضربة واحدة بس من فرشتك بتوصف اللي انا باوصفه في 12 صفحة

الصورة عبقرية