Friday, October 5, 2007

مقلب



انك تفكر انك ماشي عالطريق على أرض ثابته


فتسيب ايدك خالص


وتغمض عينيك


وفجأة تبص تحت رجليك


تكتشف انك ماشي عالهوا


وزي افلام الكرتون


توقع بمجرد ما تدرك دا


.......


المشكلة وقتها مش بتبقى في اثار الوقعة


اعتقد ان اللي بيشغلك هو انت قد ايه كنت غبي لدرجة انك توقع بالبساطة دي


.......


بيني وبينك


اثار الوقوع لا يمكن تجاهلها


ه ت د غ د غ


......



17 comments:

اميرة said...

ربنا يستر

خلي بالك الله يكرمك

fawest said...

كنت عالوزك تكلمينى اكتر عن المقلب
مش قصدى إهانة
بس ان حسيت زى مقلتى انة فيلم كرتون

حسن أمين said...

اقعي براحتك .. بس ما تنسيش اننا أحيانا ممكن نقع في مناطق أحلى بكتييييييير من اللي كنا ماشيين عليها وفاكرين اننا في أمان

هدى said...

اميرة

هحاول

او بحاول

بجد

هدى said...

فاوست

هو انا بما اني مش رغاية خالص

فجبت الخلاصة

وحبيت اعمل شوية ساسبنس

او هو دا اللي حصل غصب عني

هدى said...

حسن

الامان خدعة كبيرة

كلنا عايشينه عشان ما نفتقدهوش

زي ما قلت الوقوع وقوع

له اثاره السلبية وان كانت بسيطة

منور يا جميل

باسم المليجي said...

البوست مكتوب بطريقة جملية بس عشان نتكلم بلهجة محددة أكتر، ممكن نستبدل كلمة هتدغدغ بكلمة هتتهز ثقتك في نفسك، وممكن نكمل عليها إنك بعد ما تعدي المرحلة بتاعت الصدمة تفضل ثقتك في نفسك مهزوزة طول حياتك.. أو تبقي استفدتي تجربة وخبرة

معلش مش قصدي اتفزلك ولا حاجة

سلامتك من الآه

مادو said...

اخ
للأسف
أصبتي
قبل ما أقرأ جه على بالي سؤال أنا ليه بأقرالك باستمرار
بجد
و دلوقتي عرفت
تحياتي

يوسف said...

مفهوم يا استاذة

قد ايه كنت غبي لدرجة انك تقع بالبساطة دي
الواحد بيعصر دماغه كتير أوي في دي .. و غالبا الاجابة الوحيدة اللي بيلاقيها .. انه كان لازم يقع .. لازم

البوست بسيط و جميل باسلوب عام كده من غير تفاصيل .. لكن موضوع الدغدغة ده مش شرط .. يمكن الواحد يستفيد من الوقعة .. و يمكن يكون احسن كمان .. تدغدغ دي معناها ان التفاصيل بالنسبة لك صعبة .. ربنا يقويكي

تحياتي ليكي و للمدونة يا استاذة

altwati said...

كل عام وأنتم بخير

وينكى said...

فى الجول بجد يا هدى
كل سنه وانتى طيبه يا قمر
احساس صعب جدا جدا بالدغدغه الناتجه عن الوقعه دى
المشكله الاكبر فى الدغدغه النفسيه

amro said...

هاى
كل سنة وانت طيبة
مش مهم الوقعة، الاهم ان احنا هنوقع فين؟ هنتعور ولا هنقوم معافين؟
احيانا ممكن الوقوع يكون قرار واعى
ومقصود
تحياتى

هدى said...

باسم

الله يسلمك

بس بجد الدغدغة مش جسمانية هي نفسية وبتهز زي ما قلت ثقتك ف نفسك

يمكن دا اللي وصلي بعد الموقف بشوية ..اني ايوة قمت وقفت بس طول الوقت ما بقتش متأكدة من اي حاجة بعملها

يسلمو

هدى said...

مادو

سعادتي بوصولك لسر زياراتك المستمرة لمدونتي لا توصف

كل الود

...........

استاذ يوسف

سعيدة بزيارتك للمدونة ياريت تشرفنا تاني

وزي ما قلت قبل كدا الصدمة في الاكتشاف مش في الوقوع

ربنا يبعدنا عن الوقوع جميعا

هدى said...

محمد

وانت طيب ايها الغائب


.........

وينكي

تسلمي ياستي

وانت بالف صحة وهنا

هدى said...

عمرو

القرار بيكون احيانا مش واعي ومقصود بس بيكون هو الحل الوحيد عشان نقوم ونبدأ من تاني حاجة كدا زي ما واحدة صحبتي بتقول ..اقلب الصفحة وابدأ من الاول

منور المدونة

رانيا منصور said...

جزء من كلام حسن فـ البداية هاقوله تاني

ساعات فعلًا بنقع فت مناطق أحلى
من أي مكان توقعناه !

وصح
أقعي عادي كتير
بيقولوا الاللي بنعتبره فـ أوقات غباء ع حاجات عدّت وكان مفروض ندركه
ده فـ حد ذاته ظلم لنفسنا
لأنه ببساطة
ده بس هو اللي كان متاح لينا ندركه فـ الوقت ده
كونا أدركنا بعدين
لا يغيّر من الأمر شيء
ولا يجعل منا أغبياء :)))