أنا كدبت
لما كان السؤال اللي بيلف بيحاول يدور على أكتر حاجة بتخوفنا
ماكانش ف بالي غير خوفي الأزلي من إني أكون لوحدي .. لوحدي ماديا ونفسيا
طول عمري بخاف أقعد ف مكان لوحدي.. وكتير كان بيجيني احساس وانا ماشية في الشارع بالخوف رغم ان فيه ناس حواليا بس ببقى حاسة اني لوحدي فبخاف ... ماشية في الحياة بحاول ارمم علاقات على وشك الانهيار عشان ما ابقاش لوحدي.. وبحاول افتح سكك لعلاقات جديدة عشان ما اكتشفش لحظة فقدان علاقاتي صمودها إني لوحدي...
بيخدني حنين جارف للحظات اللي ببقى فيها وسط ناس كتير بينتكلم كلنا سوا.. ولما بقعد لوحدي بيتلعب ايدي في زراير موبايلي أكلم أي حد يمكن يقولي اقابلك ويكسر قعدتي لوحدي
امبارح بس اكتشفت إن كل دا "كان" وإن إجابتي اللي خرجتها بحماس وصوت عالي كانت محفوظة جوايا مش خارجة من لحظتها
إني قدرت وبطريقة مش مفهومة اتغلب على خوفي من الوحدة .. اكتشفت إني وأنا لوحدي مرتاحة أكتر , هادية أكتر , بفكر أكتر , وبعمل حاجات أكتر.
اكتشفت إني مش مضطرة أقدم حاجات لناس قرابين لوجودهم ف حياتي.. ومش مضطرة استحمل أذى وجود الناس لمجرد إني عايزة خيالات مآتة حواليا تهش عني طيور الوحدة...
اكتشفت إني كاملة ... لوحدي
اكتشفت إني مش محتاجة غير ليا ... مش محتاجة أبص ف الموبايل كل شوية ولا ف لستة الماسنجر المفتوح ولا صفحة الفيس بوك .. استنى بني آدم يكسر غلاف الصمت.
بقى الصمت عالم سحري... مليااااااان أسرار... والكلام باب مفتوح ع الوجع.
تدوينة هايلة يا ياسمين
ReplyDeleteهي فعلا الوحدة سيئة جدا
بس احيانا باشتاقلها
و المهم انك تقدري تتغلبي عليها
تحياتي
عارفة يا هدهد
ReplyDeleteبأحب اقفل عليا بابا الاوضة واقعد لوحدي وافكر او العب واشتغل وكل حاجة
بس بحب اكتر
لما اخرج من الاوضة عشان عايزة حد اتكلم معاه الاقي حد مستني خروجي
صباحك فل
:)
ألف مبروك
ReplyDeleteانا عارف صعوبة اللي قلتيه
لأني زيك بعاني من الوحده
وبخاف فعلا أكون لوحدي
وبآجي على نفسي كتير عشان مخسرش بعض الناس وهما ميستهلوش
عقبالي لما أتصالح مع نفسي زيك وأقدر أقعد لوحدي
إسلام
الوحدة عالم مليئ بالاشياء التي في بعض الاحيان قد اصنعها انا كالرسم او القراءة داخل حجرتي واحيانا احتاج لشخص اتكلم معه ولكن الوحدة بالفعل مطلوبة ولكم ليس في كل الاوقات انا احتمل وحدتي ولكن ليس في كل الاوقات
ReplyDeleteسعيدة انك استطعت التعامل مع الوحدة اتمني لك السعادة في كل الاوقات
هبة خميس
ReplyDeleteحلو مرورك من هنا
هو انا بس مش مستوحشة الوحدة أنا بس قدرت اصاحبها وحابه دا
..
منى
يمكن اللي كان مخوفني من إني اقفل على نفسي غني اخرج وما القيش حد فكنت بفضل طول الوقت واقفة ع الباب .. ماسكة ف الناس لتمشي تغيب ومالاقيش حد
الفكرة إني تجاوزت مخاوفي .. واتأكدت إن الناس اللي بيحبونا موجودين طول الوقت محتاجين هما كمان وقت يقعدوا فيه مع نفسهم بعيد شوية ...
صباحك زعفران
...
solom90
متشكرة على مرورك
إنك تتصالح مع نفسك دي نتيجة .. عشان توصلها لازم تمر بطريق طويل .. فيه كتير تجارب وشد وجذب
هي كدا ما تنولش منها المنى غير بعد شد وجذب واوجاع مخاض
وعجبي
.....
نودي
الحياة مش حالة واحدة الحياة مليانة حاجات مافيش حد حالته بتفضل زي ما هي
عارفة دا كويس
حلو وجودك هنا
...
طبعا مش محتاجة أقولك أد إيه إللي ف تدوينتك ده بيلعب ف حياتي دلوقتي بالذات ..
ReplyDelete..
وعارفة إني كنت مدمنة للوحدة وبعشقها إزاي ..
..
ويمكن عرفتي مؤخرا إني جربت أبقى مع الناس ..
وما خرجتش فاضية من ده ..
..
بس خرجت بإيه ده إللي مش عارفاه لدلوقت
..
مش قادرة لدلوقت أرجع عن فكرة إن الوحدة ..
أمان أكتر ..
راحة أكتر ..
عارفاها أكتر ..
عارفة الحاجة إللى تبقي عارفاها قوي .. جايبة آخرها .. عارفة دهاليزها ..
هي دي الوحدة بالنسبالي عارفاها قوي ..
..
بس برضه خرجت من قربي مع الناس وأنا مش واثقة إذا كانت الوحدة أحلى ولا لأ ..
حياة ولا لأ ..
أجمل ولا لأ ..
..
ولحد دلوفت فعلا مش عارفة ..
بجد ..
ولسه بفكر أرجع لأمانها ولا أعافر أكتر ..
.
فعلا مش عارفة ..
..
زي ما ببقى مش عارفة أتبسط عشان بقيتي قادرة تتبسطي .. أو نقول تستمتعي .. وإنتى لوحدك
ولا أضايق إنك بطلتي تعافري مع ... الـ .. مش عارفة ... بطلتي تعافري ف ده ... واخترتي الأمان .. مع نفسك
..
.
بس مش بعرف أتجاهل طعم الشجن كل ما أفتكر إنك بتعملي ده
..
.
.
طولت
معلش
دينا
ReplyDeleteرائع أن أجدك هنا صباحا
الشجن هو التوصيف الحقيقي للحالة التي أكون فيها عندما ألمس ملامح التغيير في طريقتي
لكن شجن مصحوب ببسمة إحساس بالأمان والراحة زي ما قلتي
بس انا رحت هناك لاني محتاجة لدا فعلا يمكن تعبت من المعافرة ومحتاجة شوية وقت استريح فيهم
يمكن شفت كتير قوي محتاجة وقت عشان اقدر استوعبه
يمكن فيه سؤال لسه محيرني هو انا لجأت للسكة دي لما فشلت في اني اكون وسط الناس وكان فعلا اختيار مش خيار متاح للخروج من دايرة الفشل اني اسيب كل حاجة واقعد مع نفسي
كل دا تبريرات بعدية ... مش شايفالها اهمية كبيرة لاني مصدقة اننا في الحياة عشان نعيشها مش عشان ننظر ليها
ومع كدا عندي ملاحظة
انا مش قادرة اتصور ان تجربة قربك من الناس خلصت بسرعة كدا
شايفة ان جواك ي "لساه" مليان بقدرة على المعافرة
ولا ايه؟؟
صباحك راحة و أمان