Monday, August 6, 2007

اتكلموا


هو يمكن عشان انا بطبيعتي رغاية فمش حاسة بصعوبة اللي انا بعمله

صعوبة انك تفتح بقك وتبدأ في الرغي عن كل شيء

الاحداث

الاحساس

ردود الفعل

رؤيتك

نظرياتك

تخيلاتك

حتى احقادك

وقت الالم

تلاقي لسانك كانه شلال واكسر كل الصخور قدامه

وقع من فوق بكل عزمه

وزاح عن قلبك ثقل وطاته

دا بالنسبالي سهل

ممكن يكون صعب عند الناس اللي بتسمعني طول الوقت

بس بالنسبالي

السكوت هو الزنزانه اللي بيتسجن فيها احساسي

السور العالي اللي بيحاوط روحي

وبيخنقني


...

عشان كدا ببقى حابة احس كل الي حواليا انهار بتجري

وبحس بالعجز


وانا شايفة سدود بتتبني بين وبين اقرب الناس ليا

مانعة الكلام

من انه يوصلي


بقف زي تلميذ خيبان

في امتحان شفوي

بيحاول يفتكر اسم المادة حتى ومش قادر


..

اتكلمــــــــــــــــــــــوا

اتكلموا .. اتكلموا .. اتكلموا ...

محلا الكلام ، ما ألزمه و ما أًعظمه ...

فى البدء كانت كلمة الرب الاله ، خلقت حياه ، و الخلق منها اتعلموا ..

.فاتكلموا

فى البدء كانت كلمة الرب الاله روح بجناحين شطار ،

و صار للكون مداه .

آخر مطافها ،

جت و حطت ع الشفاه ،

لما البشر ملكوا الوجود ،

و استحكموا ...

فاتكلموا

الكلمة ايد ،

الكلمة رجل ،

الكلمة بــاب ،

الكلمة نجمه كهربيه فى الضباب

الكلمة كوبرى صلب فوق بحر العباب ،

الجن يا أًحباب من ما يقدر يهدمه ...

فاتكلموا

الرمل مرمى تحت قبة السما ،

مشتاق لقطره من المطر فيها النما ،

ملايين سنين عمره ما داقها ،

انما فيه كلمة تقدر فى المراوى تِعَوَّمه ..فاتكلموا

فيه كلمة تقدر تزرع البور حور ضليل ،

و كلمة تقدر تجعل الكوخ بيت جميل ،

و ابو العيال و الجلابية الهلاهيل ،

فيه كلمه تعطيه مال ،

و كلمة تِهندمه ..فاتكلموا

لكم السلام ، يا ملفوفين حول اللهب ،

يا غواصين فى القلب ع الكلنه العجب ،

فى البدء كانت كلمة الرحمن سبب

و ما عادش غير الحق كلمة تِتَمَّه

فاتكلموا


صلاح جاهين
at

23 comments:

  1. محمد العدويAugust 6, 2007 at 10:21 PM

    عادي قوي ..

    ممكن يكون الموضوع تحقيقا لبيت أم كلثوم الشهير
    لما اشوفك يروح مني الكلام وانساه .. من فرحة القلب ساعة ما يلاقيك وياه ..

    نعمل ايه بقى اذا كان في ناس تغلب فرحة لقاءهم خزانة الآلام ..

    هذا وأسعد الله صباحك

    وحيث أني مستعجل لأني نازل متأخر فإلى لقاء ..

    ReplyDelete
  2. محمد مصطفىAugust 7, 2007 at 3:06 AM

    اممممممممممممم
    مين اللي قال انك رغاية يا هدى
    لأ طبعا حاشا و ماشا
    مستحيييييييييييييل
    لا يمكن ابدا
    بس لو مصرة ماشي
    المهم
    أكيد الكلام مهم جدا
    بأحسه زي المية النازلة على جسمي و أنا باخد دش احساس لذيذ بالتطهر و النقاء و الانتعاش
    بوست جيد كالعادة

    ReplyDelete
  3. إبـراهيم ... August 7, 2007 at 5:22 AM

    فاتكلموا
    فيه كلمة تقدر تزرع البور حور ضليل ،
    و كلمة تقدر تجعل الكوخ بيت جميل ،
    و ابو العيال و الجلابية الهلاهيل ،
    فيه كلمه تعطيه مال ،
    و كلمة تِهندمه ..فاتكلموا
    لكم السلام ، يا ملفوفين حول اللهب ،
    يا غواصين فى القلب ع الكلنه العجب ،
    فى البدء كانت كلمة الرحمن سبب
    و ما عادش غير الحق كلمة تِتَمَّه
    فاتكلموا
    >
    >
    حلو ... قوووي


    شكرًا .
    .
    و ...
    هـدى

    ReplyDelete
  4. رضوى داودAugust 8, 2007 at 7:05 AM

    السكوت هو الزنزانه اللي بيتسجن فيها احساسي
    السور العالي اللي بيحاوط روحي
    وبيخنقني

    تعرفي انا كنت عايشه كده لحد ما اتخنقت فعلا بعدين خلاااااااص مس هاكتم الكلام جوايا تاني ابدا


    فعلا بيبقي احساس مرير

    ReplyDelete
  5. باسم المليجيAugust 8, 2007 at 12:48 PM

    بليز خلي حد تاني يقول الكلمتين دول
    دا أنا بقالي كتيييييييييير بدخل المدونة ومافيش بوستات جديدة
    على العموم حمدالله بسه
    وعقبال الجاي

    ReplyDelete
  6. احمد عطاللهAugust 9, 2007 at 9:47 AM

    هدى ياريت تكلمينى ضرورى

    ReplyDelete
  7. هدىAugust 9, 2007 at 1:25 PM

    محمد العدوي

    بتثبتني ها ؟

    ماشي ياسيدي

    هعمل نفسي مصدقة كلامك

    بس حاول تخلي فرحة اللقاء تاخد وقتها وتعدي

    ما تطولش لاخر العمر

    ها

    سعدت بيك كما انا دائما

    ReplyDelete
  8. هدىAugust 9, 2007 at 1:26 PM

    مادو

    بتتريق طبعا

    على فكرة ولا بتفرق معايا

    لعلمك انا بقول كدا عشان اخزي العين

    لكن انا مش رغاية

    انا مش محتاجة ارغي

    ها؟

    ومع هذا حلو قوي تشبيهك

    عجبني

    تصدق تنفع تبقى شاعر

    ReplyDelete
  9. هدىAugust 9, 2007 at 1:27 PM

    ابراهيم

    صلاح جاهين

    نعمل ايه

    عبقري بالفطرة

    وعبقريته صبغت على كل الفكرة بهاء من نوع خاص

    واخد بالك من بهاء دي

    ReplyDelete
  10. هدىAugust 9, 2007 at 1:29 PM

    اميرة

    سعيدة بجد بقرارك دا

    ممكن تقوللي اني بعيشه ببكارته تاني معاكي

    يمكن احيان كتيرة بتشتاقي للسجن دا

    بطر عالنعمة تقوللي ايه

    ويبقى الصمت الملاذ الاخير

    بس سيبك منه دا بيبقى بعدييييييييييييين بعد عشرة كام سنة مع الكلام وبيبقاله وقته

    اممممممم

    سعيدة بيكي وليكي

    ReplyDelete
  11. هدىAugust 9, 2007 at 1:31 PM

    باسم المليجي

    منور يا باشا

    انا بس عايزة البشر تستوعب الدر ر اللي بقولها ف كل بوست

    تاخد وقتها يعني في التمحيص والتدقيق

    ولا انت ليك رأي تاني

    ReplyDelete
  12. محمد مصطفىAugust 10, 2007 at 1:38 PM

    بصراحة
    اه
    بس البوست عجبني فعلا
    خطك حلو ع الكيبورد

    ReplyDelete
  13. horasAugust 13, 2007 at 2:38 PM

    حلو أوى
    حلو بجد

    ReplyDelete
  14. عين ضيقةAugust 14, 2007 at 9:02 AM

    الله عليه جاهين

    على فكرة
    خليكى زى ماانت

    سلام

    ReplyDelete
  15. fawestAugust 15, 2007 at 8:06 PM

    امال هما عماوا المدونات لية

    ReplyDelete
  16. AmyraAugust 16, 2007 at 8:10 AM

    هدى

    مش متخيلاكي رغاااااية مش عارفة ليه؟

    بس بما انك بتقولي انك بتحب الكلام فخليكي كدة

    وحشتيييييييييني

    :))))

    ReplyDelete
  17. hamdoolAugust 17, 2007 at 8:11 AM

    قسما عظما
    أول زياره ومش حتكون الأخيره

    keep up the great work


    hamdool/ Kuwait

    ReplyDelete
  18. إبـراهيم ... August 18, 2007 at 1:54 AM

    فيـنــــك ؟؟؟؟

    ReplyDelete
  19. هدىAugust 18, 2007 at 5:47 AM

    horas

    انت الاحلى

    اهلا بيك

    ReplyDelete
  20. هدىAugust 18, 2007 at 5:48 AM

    عين ضيقة

    منورة ياقمر

    عنيا حاضر

    رغم اني مؤمنة بقدرية التغيير وحتميته
    بس هحاول ابعد الرغي عن مجاله

    تحياتي

    ReplyDelete
  21. هدىAugust 18, 2007 at 5:49 AM

    fawest

    عملوها عشان الرغايين اللي زيي

    يصدعوا الناس بكلام كتير

    على العموم انا تقريبا بنزل كل كتير بوست

    وبفرط في حقي في المدونة

    وما تسالنيش ليه

    سعيدة بيك هنا

    ReplyDelete
  22. هدىAugust 18, 2007 at 5:51 AM

    ندى

    كنت تقريبا لامحة الصورة اللي انتي رسمهالي

    مش هقولك انها مش حقيقية

    بس فيه هديااااات تانيين لسه ما شفتهومش

    ..

    خليكي قريبة دايما

    بتوحشيني

    ReplyDelete
  23. هدىAugust 18, 2007 at 5:53 AM

    hamdoool

    ياريت فعلا ما تكونش اخر مرة

    نورت

    وهتنور كل مرة

    تحياتي

    ReplyDelete