Sunday, April 26, 2009

وحدي


أنا كدبت

لما كان السؤال اللي بيلف بيحاول يدور على أكتر حاجة بتخوفنا

ماكانش ف بالي غير خوفي الأزلي من إني أكون لوحدي .. لوحدي ماديا ونفسيا

طول عمري بخاف أقعد ف مكان لوحدي.. وكتير كان بيجيني احساس وانا ماشية في الشارع بالخوف رغم ان فيه ناس حواليا بس ببقى حاسة اني لوحدي فبخاف ... ماشية في الحياة بحاول ارمم علاقات على وشك الانهيار عشان ما ابقاش لوحدي.. وبحاول افتح سكك لعلاقات جديدة عشان ما اكتشفش لحظة فقدان علاقاتي صمودها إني لوحدي...

بيخدني حنين جارف للحظات اللي ببقى فيها وسط ناس كتير بينتكلم كلنا سوا.. ولما بقعد لوحدي بيتلعب ايدي في زراير موبايلي أكلم أي حد يمكن يقولي اقابلك ويكسر قعدتي لوحدي

امبارح بس اكتشفت إن كل دا "كان" وإن إجابتي اللي خرجتها بحماس وصوت عالي كانت محفوظة جوايا مش خارجة من لحظتها

إني قدرت وبطريقة مش مفهومة اتغلب على خوفي من الوحدة .. اكتشفت إني وأنا لوحدي مرتاحة أكتر , هادية أكتر , بفكر أكتر , وبعمل حاجات أكتر.

اكتشفت إني مش مضطرة أقدم حاجات لناس قرابين لوجودهم ف حياتي.. ومش مضطرة استحمل أذى وجود الناس لمجرد إني عايزة خيالات مآتة حواليا تهش عني طيور الوحدة...

اكتشفت إني كاملة ... لوحدي

اكتشفت إني مش محتاجة غير ليا ... مش محتاجة أبص ف الموبايل كل شوية ولا ف لستة الماسنجر المفتوح ولا صفحة الفيس بوك .. استنى بني آدم يكسر غلاف الصمت.

بقى الصمت عالم سحري... مليااااااان أسرار... والكلام باب مفتوح ع الوجع.

Thursday, April 16, 2009

تقاسيم


يمتلك عينين بنيتين مليئتان بالرغبة في مقاسمتها جلسة شتوية... وتمتلك قلبا مليئا بالذكريات الباردة تحول دون رغبته.

يعتني كل صباح بوردتها التي تناستها عمدا على الكرسي الشاغر بينهما.. وتنفق صباحاتها في محو تفاصيل الحكاية من فوق زجاج شباكها..

يتأمل في حزن بهي ضحكاتها التي توزعها بمقدار على الرفاق المشتركين بينهما... وتستمر هي في تعلية الجدار الفاصل بين كونيهما.

يقضي الليل في ترتيل أغنية حزينة.. وترقص هي بعنف على موال شعبي..

يتراجع خطوات في قراره بالبعد .. وتمد هي يدها لتلحق بآخر عربة في قطار الرحيل.

Wednesday, April 15, 2009

صباح

ساعات أقوم الصبح قلبي حزين
مش بيبقى عندي مزاج للحياة
ومع ذلك عندي قدرة على إجبار نفسي على ممارسة الحياة .. بتكشيرة عريضة
بيوجعني قوي إني ابقى مضطرة ابتسم
بس بحسها ضريبة ولازم أدفعها إني جوا الحياة
الغريب إن انهاردة الحياة مبتسمه عند الناس حواليا
وحش الفيس بوك بيخليك قاري وشوش الكل .. ومحدد مزاجهم بالسنتي
ولما يبقى مزاجك مش قد كدا تتجنب تحط حالة على صفحتك وتكتفي بالتعليق على النشوة المتسطرة على طول الحائط بتاعك على الوشوش الصباحية
يمكن تتنقلك العدوى
قلت إن الدنيا غريبة
آديني بقول
...